WILLEMSTAD – “Tin demasiado stranhero indokumentá i stazjèrnan Ulandes ta okupá kuponan di trabou a kosto di nos mes hendenan. Mester implementá i ehekutá sanshonnan severo i introdusí kòntròl regular, pa más lihe posibel solushoná e problema aki i trese alivio pa nos hendenan”. Segun Ivar Asjes, kalkulashon ta mustra ku esaki por sòru pa miles di kupo di trabou èkstra pa yu’i Kòrsou.

Ivar Asjes semper a boga pa un desaroyo ekonómíko duradero kaminda kuponan di trabou primeramente mester bai p'e yu'i Kòrsou. Komo diputado, na aña 2004, ela traha ku alma i kurpa pa e sektor di turismo lanta kabes. “Komo resultado konkreto nos a logra di lòs diferente proyekto turístiko i a pronostiká ku esakinan lo habri más ku 4.000 kupo di trabou”. Na aña 2006 nos a bai laga un plan konkreto atras kon por prepará kasi 1.000 yu di tera pa aña pa traha den turismo. Sinembargo e Gobièrnu ku signatura di PAR a skohe pa keda sin atendé e plan aki i ta hopi tristu pa konstatá ku despues mester a buska miles di stranhero pa, enbes di yu'i Kòrsou, okupá mayoria di e kuponan di trabou ku a keda kreá den turismo”.

Sifranan di Ofisina Sentral di Estadístika (CBS) tambe ta indiká ku e Gobièrnu di PAR, PNP i FOL a kita yu’i Kòrsou foi trabou i remplasá nan ku stranhero. “E enkuesta laboral di CBS pa aña 2009 ta papia palabra klá i a demostrá ku 1.059 yu’i Kòrsou a pèrde trabou i ta kasi 1.300 stranhero a haña trabou na nan lugá. Esaki no ta hustu”. Asjes ke enfatisá ku Pueblo Soberano no ta kontra di stranhero. “Nos ta respetá tur hende ku ta (òf ke bin) biba na Kòrsou ku e deseo pa traha i kontribuí na desaroyo di nos dushi Isla i ku ta identifiká nan mes tambe ku nos kultura, idioma Papiamentu, himno i bandera. Pero nunka por t’asina ku trahadó stranhero (indokumentá) i stazjèrnan Ulandes ta haña trabou a kosto di yu’i Kòrsou ku ta pèrdè trabou .

Segun Asjes, un sosten masal pa Pueblo Soberano dia 27 di ougustus awor ta nifiká ku trabou ta bai pa yu’i Kòrsou, punto! Pueblo Soberano lo pasa un lei ku ta preskribí pa minimal 85% di kuponan di trabou den tur sektor na Kòrsou primeramente keda okupá pa yunan di tera. Na mesun momentu lo reservá sufisiente medionan finansiero pa prepará nos hendenan desempleá pa okupá e puestonan di trabou aki. Ademas, Pueblo Soberano lo informá nos kompatriotanan na Hulanda i St. Maarten ku tin trabou tambe pa nan i hasi tur esfuerso pa insentivá nan pa bin kas bèk. Ta p'esei, Asjes a finalisá bisando, un voto pa Pueblo Soberano ta garantia ku trabou ta bai pa yu'i Kòrsou.

*******